lé vièr châté

Y'a 'té des fortificâtions sus l'mont du châté d'pis l'Âge dé Fé et tout probabliément d'pis l'êpoque Néolithique, mais la bâtithie du châté qu'nou vait ach'teu fut c'menchie d'vièrs lé c'menchment du treîzième siècl'ye.

Ch'tait la prînse d'la Nouormandie continentale par l'Rouai d'France tchi 'tait la raison pouor tchi qu'lé Rouai Jean, not' Duc, dêcidit d'protégi Jèrri auve un châté sus chutte pliaiche-chîn.

À la siette dé l'învention du canon, l'Vièr Châté pèrdit un mio dé s'n împortance militaithe et l's autorités pliannîtent un nouvieau châté - lé Châté Lîzabé - tchi l'rempliaîchit coumme défense prîncipale dé l'Île. Né v'chîn pouortchi qu'nou lé nomme en Jèrriais "lé Vièr Châté".

Lé Vièr Châté 'tait r'gré d'vièrs la fîn du dgiêx-septième siècl'ye mais nou peut dithe qu'lé châté 'tait mains fait sèrvi auprès chenna, et i' fut donné au publyic dé Jèrri en 1907 coumme monûment historique.

Mais ché n'tait pon là la fîn d'san sèrvice militaithe, pa'ce qu'les Allémands l'fîtent sèrvi duthant l'Otchupâtion et ajouôtîtent des fortificâtions étout.